Хархорум музей, ДӨ-ОХСДГ-ын Хамгаалалтын Захиргаа, Япон Улсын Нара Их Сургуулийн багш Шимизү Нацуки хамтран “Соёлын өвийг хамгаалах ашиглахад нутгийн иргэдийн оролцоог нэмэгдүүлж, орон нутгийг хөгжүүлэх системийн судалгаа”-ны төслийг Өвөрхангай аймгийн Хархорин суманд 2015-2016 онд амжилттай хэрэгжүүлсэн. 2017 оноос Хархорум музей энэ төслийн үр дүнг “Хархорины өв соёл” үзэсгэлэнгээр дамжуулж музейн эвент болгон зарласан билээ.

“Хархорины өв соёл”-2 түр үзэсгэлэнг 2017 оны 07 сарын 25-аас 2017 оны 09 сарын 01 хүртэл музейн гаднах Уламжлалт тоглоом наадгайн төвд зохион байгуулж Хархорин сумын ард иргэдийн цагаан идээ болон арьс шир боловсруулах нутгийн онцлогтой уламжлалт арга технологи, монгол тоглоом наадгай, үндэсний бичиг соёлыг гадаад дотоодын жуулчдад сурталчлан таниулж нийтийн хүртээл болгов.

“ОЮУНТҮЛХҮҮР” түр үзэсгэлэн амжилттай зохион байгуулагдлаа.

Монголын ард түмэн өвөг дээдсийнхээ бүтээсэн соёлын өвийг ашиглан үр хүүхэд хойч үеэ сурган хүмүүжүүлж ирсэн баялаг туршлагатай бөгөөд энэ өвийн нэгээхэн хэсэг нь Монгол тоглоом наадгай юм.

Монгол тоглоом наадгай нь хүүхэд багачуудад ард түмний ахуй амьдрал, зан заншил, ёс суртахуун, байгаль юмсын тухай ойлголт өгч, хүүхдийн хэл яриа, авхаалж самбаа, оюун санааг хөгжүүлэхэд чиглэгдсэн хүмүүжил сургалтын баялаг агуулгатай байдаг.

Иймээс Хархорум музей нь Боловсрол танин мэдэхүйн “Монгол тоглоом наадгай” хөгжүүлэх хөтөлбөрийг хэрэгжүүлдэг.

“Монгол тоглоом наадгай” хөтөлбөрийг хэрэгжүүлэх үйл ажиллагааны хүрээнд Дэлхийн Өв- Орхоны Хөндийн Соёлын Дурсгалт Газарт орших Хархорин, Хужирт, Бат-Өлзий, Хотонт, Хашаат сумдын иргэдийн дунд хадгалагдаж буй ховор тоглоом наадгайг сурвалжлан олох, бүртгэн баримтжуулах судалгааны ажлыг  2016 оны 04 дүгээр сард хийлээ.

Судалгаанд Хархорин сумын Ганган-Орхон, Вангийн Овоо, Эрдэнэтолгой, Орхон, Нарийн хүр, Онгоцон Ухаа, Жалбаа, Шанх гэсэн 8 багийн нийт 600 гаруй иргэд хамрагдаж 10 гаруй иргэний Зэндмэнэ, Бажий, Хорол, Оньс, Хөлөгт зэрэг тоглоом наадгайг уламжлан хадгалж байгааг нь илрүүлэв.

“НУУЦ ЕРТӨНЦ” – ТҮР ҮЗЭСГЭЛЭН 2015 ОНЫ 05 САРЫН 01-НЫ ӨДРӨӨС ХАРХОРУМ МУЗЕЙН ТҮР ҮЗЭСГЭЛЭНГИЙН ТАНХИМД НЭЭГДЭНЭ

Хархорум музейн сан хөмрөгт хадгалагдаж буй Булган аймгийн Баяннуур сумын Шороон бумбагар бунхнаас илэрсэн 410 гаруй олдвор, 40  гаруй бунхны ханын зургийн баримжуулалтаас  дээжлэн 210 гаруй үзмэр, бунхны ханын зургийн  11  гэрэл зургийг багтаасан иж бүрэн үзэсгэлэнг  2015 оны 05 дугаар  сарын 01-ны өдрөөс эхлэн Хархорум музейн түр үзэсгэлэнгийн танхимд  зохион байгуулж нийтийн  хүртээл болгож байгаа тул та бүхнийг хүрэлцэн ирж таалан үзэхийг урьж байна.

МЭ VII зууны үед хамаарах Түрэгийн язгууртны бунхан нь Монголд төдийгүй  Төв Азийн бүс нутагт анх удаа илэрсэн баялаг олдвортой иж бүрэн ханын зураг бүхий байгууламж  гэдгээрээ судлаачдын анхаарлыг ихэд татаж байна.

Хархорум музей нэг ээлжиндээ 100 гаруй хүн хүлээн авах хүчин чадалтай. Байнгын, түр болон гадаах үзэсгэлэнгийн хэсгүүдээс бүрдэнэ. Та бүхэн манай түр үзэсгэлэнгийн танхимд өөрийн үзэсгэлэн гаргаснаар Дэлхийн Өв - Орхоны Хөндийн Соёлын Дурсгалт Газарт ирж буй гадаад, дотоодын жуулчдад өөрийн уран бүтээлээ сонирхуулах боломжтой юм.

Хархорум музей түр үзэсгэлэнгийн санал байнга авч байна.

Түр үзэсгэлэн зохион байгуулах журам - энд дарж татаж авна уу.

Үзэгэлэн зохион байгуулах гэрээ, санал - энд дарж татаж авна уу.